هواپیماهای جنگی تاجیکستان مناطقی از ولایت تخار را بمباران کرد

  • انتشار: ۵ سنبله ۱۳۹۷
  • سرویس: اجتماعی
  • شناسه مطلب: 46627

منابع در ولایت تخار می گویند که صبح امروز هواپیماهای جنگی تاجیکستان مناطقی از ولایت تخار را بمباران کرده است

مقام‎های محلی تخار می‎گویند که بخش‎هایی از ولسوالی درقد این ولایت از سوی هواپیماهای جنگی نیروهای نظامی تاجیکستان بمباران شده است.

محمدجواد هجری، سخنگوی والی تخار، به کلید گفته است که هواپیماهای جنگی نیروهای تاجیکستانی حوالی ساعت هفت صبح امروز دوشنبه بر فراز ولسوالی درقد این ولایت به پرواز درآمده بود.

منابع می گویند که تاجیک‌ها به‌منظور سرکوب قاچاقچیان مواد مخدر به این منطقه حمله کرده‌اند. گفته می‌شود که این قاچاقچیان احتمالاً با طالبان همدست بوده‌اند.

منابع امنیتی تخار نیز با تأیید این خبر می‌گویند که درگیری میان قاچاقچیان و مرزبانان تاجیکستانی عصر روز گذشته هنگامی آغاز شد که قاچاقچیان می‌خواستند از مرز عبور کنند.

خلیل اسیر سخنگوی پلیس تخار می‌گوید، در حمله نظامیان تاجیکستان به ولسوالی درقد، ۶ عضو طالبان کشته شده و ۹ تن دیگرشان زخم برداشته‌اند.