رحمان: تاجیکستان در خط مقدم مقاومت علیه تهدیدهای ناشی از افغانستان قرار دارد

امام‌علی رحمان؛ رییس جمهوری تاجیکستان می‌گوید که خاک افغانستان منبع تهدیدها و چالش‌های مدرن است و کشورش خط نخست مقاومت در برابر این تهدیدات می‌باشد.

رحمان در بیانیه‌ای گفته‌است: «خاک افغانستان همچنان منبع گسترش تهدیدها و چالش‌های مدرن است و تاجیکستان که مرزی طولانی با این کشور دارد، در خط مقدم مقاومت در برابر آن‌ها قرار دارد.»

در بیانیه رییس جمهوری تاجیکستان آمده‌است که بحران عمیق سیاسی، نظامی، اقتصادی و اجتماعی در افغانستان بر نگرانی‌های جامعه جهانی افزوده و باعث ایجاد تنش در منطقه شده‌است.

رییس جمهوری تاجیکستان همچنین از آمادگی کشورش برای تسهیل روند کمک‌رسانی به افغانستان خبر داده و گفته‌است که تاجیکستان آماده‌است تا ظرفیت‌های لجستیکی گسترده خود را برای ارائه کمک‌های بین‌المللی به کار ببندد.

تاجیکستان از معدود کشورهای همسایه افغانستان است که هرگونه سازش با دولت طالبان را رد کرده و همواره بر تشکیل حکومت فراگیر با حضور همه اقوام تاکید ورزیده‌است.

به دنبال تسلط طالبان بر افغانستان، تنش‌هایی میان این گروه و تاجیکستان نیز به وجود آمد که منجر به استقرار نظامیان با سلاح‌های پیشرفته در دو سوی مرز شد. طالبان اظهارات مقامات تاجیکستان در مورد افغانستان را «مداخله در امور داخلی» کشور می‌خوانند.

اخیراً روسیه نیز ابراز آمادگی کرده که در صورت متوجه‌بودن تهدیدی علیه تاجیکستان از مرزهای افغانستان، در کنار این متحد خود می‌ایستد.