ازبکستان و تاجیکستان خواستار تصاحب هواپیماهای افغانستان شدند

خبرگزاری رویترز گزارش داده که کشورهای ازبکستان و تاجیکستان از امریکا خواسته‌اند که تعدادی از هواپیماهای افغانستان را که در جریان سقوط کابل به این کشورها برده شده‌اند را نگه دارند.

این خبرگزاری به نقل از مقامات امریکایی گفته‌است که حکومت امریکا درخواست این دو کشور را در زمینه نگه‌داری تعدادی از هواپیماهای افغانستان بررسی می‌کند.

این در حالی ‌است که بر اساس تخمین خلبانان افغان، آن‌ها در جریان سقوط کابل ۴۶ هواپیما را به ازبکستان و ۱۷ هواپیمای دیگر را به تاجیکستان برده‌اند.

این هواپیماها از سوی امریکا در اختیار نیروهای امنیتی حکومت پیشین قرار گرفته‌بود.

طالبان بارها از ازبکستان خواسته‌اند تا هواپیماهای یادشده را به آن‌ها تحویل دهد؛ درخواستی که علیرغم روابط سیاسی تاشکند – کابل، هنوز اجابت نشده‌است.

ده‌ها خلبان نیروی هوایی افغانستان هم که در جریان سقوط به کشور تاجیکستان رفته‌بودند پس از چند ماه بلاتکلیفی به تاریخ ۱۸ عقرب توسط امریکا به کشور سوم منتقل شدند.