احضار سفیر افغانستان در تاجیکستان در واکنش به اظهارات کاکای رئیس جمهور غنی

  • انتشار: ۲۰ جدی ۱۳۹۵
  • سرویس: تیتر 2
  • شناسه مطلب: 16872

وزارت خارجه تاجیکستان در واکنش به اظهارت قیوم کوچی، سفیر افغانستان در تاجیکستان را احضار و خواهان توضیح در  این مورد شده است.

وزارت خارجه‌ تاجیکستان در واکنش به اظهارات قیوم کوچی، سفیر افغانستان در روسیه و کاکای رییس جمهور، سفیر کشور را احضار کرده و در نامه ای از حکومت افغانستان خواسته که در مورد اظهارات آقای کوچی بررسی و اقدام جدی کند.

در این نامه وزارت خارجه‌ تاجیکستان نوشته است که آقای کوچی بدون داشتن سند مردم و رهبری تاجیکستان را متهم و به هویت این کشور توهین کرده است.

وزارت خارجه‌ کشور موضوع این نامه را تایید کرد، ولی در مورد آن ابراز نظر نکرد.

قیوم کوچی، سفیر افغانستان در مسکو در گفتگو با یک شبکه‌ی تلویزیونی موسوم به “شفیع عیار” مقیم امریکا، مردم تاجیکستان را متهم به دست داشتن در روند تهیه‌ مواد مخدر افغانستان، کرده است.

در این ویدیوی که به تاریخ اول جدی ۱۳۹۵ در شبکه‌ی یوتیوب “شفیع عیار” پخش شده، آقای کوچی گفته است که او برای تداوی همسرش به امریکا سفر کرده و در این جریان با سفیر روسیه و شماری از متخصصان آن کشور دیدار کرده است.

او به این مقام‌های روسی گفته است: “مواد مخدر در افغانستان کشت می‌شود، ولی پشت آن شما هستید (روس‌ها)، پشت آن مافیای تاجیکستان است.”

آقای کوچی افزوده است: “تاجیکستان یک کشور بسیار کوچک است. حتا پنچ میلیون نفوس ندارد و یک میلیون آن هم روس است. فرهنگ‌ و زبان رسمی‌‍شان روسی است. حق ندارند زبان خود را بنویسند و حتا الفبای دری را تغییر داده‌‍اند. مافیا در این کشور بسیار فعال است.”

قیوم کوچی سفیر افغانستان در روسیه است، وی کاکای رئیس جمهور غنی نیز می باشد. قیوم کوچی در انتخابات گذشته ریاست جمهوری یکی از هواداران سرسخت اشرف غنی بود.