درخواست نواز شریف از عبدالله برای سفر به پاکستان

دولت پاکستان بار دیگر از عبدالله عبدالله، رییس اجراییه دولت وحدت ملی دعوت کرده است که تا به اسلام آباد سفر کند.

رییس اجراییه، دعوت پیشین نخست وزیر پاکستان، نواز شریف  را پس از حمله  انتحاری مرگبار  که  ریاست محافظت از رجال برجسته در شهر کابل را هدف قرار داد، لغو کرده بود.

با این حال رسانه های پاکستانی گزارش دادند که  نواز شریف در یک دیدار کوتاه با عبدالله در حاشیه نشست آغاز طرح کاسا 1000 در شهر دوشنبه تاجیکستان، یک بار دیگر از او دعوت کرده است که به اسلام آباد سفر کند.

نواز شریف، در دوشنبه بار دیگر تاکید کرده است که کشورش خواستار روابط صلح آمیز با همسایگانش است.

این در حالیست که چند روز پیش پاکستان از حامد کرزی رئیس جمهور پیشین کشور نیز دعوت کرد تا به اسلام آباد سفر کند.

دعوت پاکستان از رئیس اجرائیه و رئیس جمهور پیشین کشور در حالی است که فضای خوبی بر روابط دو کشور حاکم نیست .

اخیرا رئیس جمهور در کنفرانس لندن، از پاکستان به شدت انتقاد کرده بود که به ‌رغم درخواست مکرر دولتش، اسلام آباد هنوز علیه طالبان افغان اقدامی نکرده است.