روسیه و تاجیکستان حفاظت های مرزی بین افغانستان و تاجیکستان را تقویت می کند

  • انتشار: ۱۰ حوت ۱۳۹۵
  • سرویس: بین الملل
  • شناسه مطلب: 18841

روسیه و تاجیکستان موافقت کرده اند که برای جلوگیری از گسترش منازعه از افغانستان به این کشور آسیای مرکزی، محافظت مرز تاجیکستان با افغانستان را تقویت ببخشند. این توافق در سفر رئیس جمهور روسیه به دوشنبه صورت گرفت.

ولادیمیر پوتین، رئیس جمهور روسیه روز دوشنبه با همتای تاجیک خود امام علی رحمان در شهر دوشنبه پایتخت تاجیکستان دیدار و گفتگو کرد.

به گزارش خبرگزاری رویترز، پوتین در دوشنبه گفت: «ما به توافق رسیدیم که برای حفاطت از مرز تاجیکستان-افغانستان تلاش کنیم که شامل استفاده از پایگاه نظامی موجود روسیه در تاجیکستان می‌شود.»

پوتین گفت که تاجیکستان یک کشور تعیین‌کننده در جنگ علیه تروریسم بین‌المللی است. او گفت: «ما تاجیکستان را یک کشور کلیدی برای امنیت و ثبات منطقه می‌دانیم.»

تاجیکستان سال گذشته به دلیل تهدیدهای امنیتی ناشی از قاچاقبران مسلح، آدم ربایان و همچنین شورشیان اسلام‌گرا شمار سرباز مرزی خود در مرز افغانستان را افزایش داده بود.

روسیه و تاجیکستان، جمهوری پیشین اتحاد جماهیر شوروی سابق، سال گذشته به صورت مشترک یک مانور نظامی را در نزدیکی مرز افغانستان راه اندازی کردند.

روسیه چندین بار از وضعیت امنیتی در مرز افغانستان و تاجیکستان ابراز نگرانی کرده است تا مباداَ شورشیان اسلام‌گرا از شمال افغانستان به آسیای میانه نفوذ کنند.

پوتین هفته گذشته گفته بود که شمار بیشتر از آنچه تا حالا تصور می‌رفت، از جمهوری‌های سابق اتحاد جماهیر شوروی به گروه داعش پیوسته اند. او گفت که تنها از سوریه حدود ۴۰۰۰ تن و از دیگر جمهوری‌های سابق اتحاد جماهر شوروی نیز حدود ۵۰۰۰ تن به این گروه تروریستی پیوسته اند.

نظرات(۰ دیدگاه)

نظر شما چیست؟