گفتگوی پوتین با رییس جمهوری تاجیکستان در مورد ناامنی در شمال افغانستان

کاخ کرملین از گفتگوی تلفونی ولادیمیر پوتین؛ رییس جمهوری روسیه با امام‌علی رحمان؛ همتای تاجیکستانی‌اش خبر داده و گفته که دو طرف در این گفتگو درباره وضعیت مناطق مرزی تاجیکستان و افغانستان بحث کرده‌اند.

طبق اعلامیه دفتر ریاست جمهوری روسیه، پوتین بر آمادگی روسیه برای ارائه کمک‌های لازم به تاجیکستان در برابر تهدیدات امنیتی تاکید کرده است.

این در حالی است که طالبان با تشدید حملات شان، ده‌ها ولسوالی از جمله مناطق مرزی را در شمال و شمال شرق کشور تصرف کرده‌اند.

یک منبع در کمیته امنیت ملی تاجیکستان به رسانه‌های روسی گفته است که طالبان در حال حاضر بیش از ۷۰ درصد خط مرزی افغانستان با تاجیکستان را تحت کنترل دارد.

به‌دنبال ناامنی در شمال کشور، نیروهای مرزی تاجیکستان به حالت آماده‌باش درآمده‌اند.

به تازگی گزارش شده که به شمار نیروهای مرزی تاجیکستان نیز اضافه شده‌اند.

گفتنی است که ناامنی در شمال افغانستان همواره مورد نگرانی روسیه و کشورهای آسیای میانه بوده است.

به تازگی مقام‌های روسی در گفتگو با حمدالله محب؛ مشاور امنیت ملی اشرف‌غنی گفته است که افزایش ناامنی در شمال افغانستان، می‌تواند، روسیه و کشورهای آسیای میانه را با تهدید مواجه کند.