وزیر تحصیلات طالبان: درس خواندن دختران فرهنگ غربی ها است!

سرپرست وزارت تحصیلات عالی طالبان می‌گوید که فرستادن دختران به مکتب فرهنگ خارجی‌ها است.

به گزارش خبرگزاری اطلس به نقل از شفقنا افغانستان، ندامحمد ندیم، سرپرست وزارت تحصیلات عالی طالبان، این موضوع را در یک نوار تصویری‌ که در شبکه‌های اجتماعی منتشر شده، بیان کرده است.

او افزوده که فرستادن دختران به مکتب فرهنگ خارجی‌ها است و این فرهنگ را امان‌الله خان و ظاهرشاه به افغانستان آوردند. به گفته او، در آن‌ زمان عالمان دین با این تصمیم امان‌الله خان مخالفت کردند.

ندیم تصریح کرده است: «در زمان ظاهر بزرگان قومی گفتند که غیرت، حیا و ایمان ما اجازه نمی‌دهد که دختران ما به مکتب بروند.»

سرپرست وزارت تحصیلات عالی طالبان خاطرنشان کرده است که عالمان دینی در زمان ظاهرشاه نیز به دلیل مخالفت‌شان ده‌ها سال زندانی شده بودند.

گفتنی است که طالبان پس از تسلط بر کشور، دروازه مکتب‌ها را به روی دختران بالاتر از صنف ششم بسته و آنان را از ادامه درس محروم کرده‌اند.