رییس جمهور اوزبیکستان خواستار برگزاری انتخابات زودهنگام ریاست جمهوری شد

بربنیاد گزارش‌ها، شوکت میرضیایف، رییس جمهور اوزبیکستان، خواستار برگزاری انتخابات زودهنگام ریاست جمهوری در ماه جولای سال روان میلادی شد.

رسانه‌های بین‌المللی روز دوشنبه، ۸ می، به نقل از دفتر ریاست جمهوری اوزبیکستان گزارش داده‌اند که میرضیایف با صدور فرمانی نهم جولای را تاریخ برگزاری انتخابات زودهنگام تعیین کرده است.

وی روز دوشنبه بار دیگر از نتایج همه‌پرسی اخیر در آن کشور استقبال کرده و گفته است: «این رای‌گیری نشان داد که شعور سیاسی، فرهنگ قانون‌مداری و بینش ‌جهانی مردم ما رشد کرده است.»

این در حالی است که شهروندان اوزبیکستان هفته گذشته به همه‌پرسی رای دادند که براساس آن میرضیایف می‌تواند برای دو دور هفت‌ساله دیگر، یعنی تا سال ۲۰۴۰ رییس جمهور این کشور باشد.