دعوت «امام علی رحمان» از «اشرف غنی» برای سفر به تاجیکستان

  • انتشار: ۳ سنبله ۱۳۹۹
  • سرویس: اخبار مهم
  • شناسه مطلب: 93274

اشرف غنی، رئیس جمهور با امام علی رحمان، همتای تاجیکستانی خود به صورت تلفنی گفتگو کرد.

رئیس ‌جمهور تاجیکستان در این گفتگو از اشرف غنی دعوت کرد تا به دوشنبه سفر کند و رئیس جمهور نیز این دعوت را پذیرفت.

ریاست جمهوری اعلام کرد که طرفین در این گفتگو پیرامون روابط دو جانبه به ویژه تجارت، ترانزیت، تقویت هر چه بیشتر همکاری‌های منطقه‌ و افزایش همکاری‌ها نیز گفتگو کرده‌اند.

اشرف غنی گفته است که مرز افغانستان و تاجیکستان به نقطه دوستی و پیشرفت مبدل خواهد شد.

امام علی رحمان، رئیس جمهور تاجیکستان نیز در گفتگو با غنی بیان داشت که کشورش از روند صلح به رهبری و مالکیت حکومت افغانستان حمایت می‌کند.

امام علی رحمان وعده داد که تاجیکستان در نشست‌های منطقه و بین المللی در کنار افغانستان خواهد بود و از موضع حکومت افغانستان حمایت می کند.

طبق اعلامیه ارگ ریاست جمهوری، طرفین توافق کردند که هیاتی تحت ریاست محمد حنیف اتمر، سرپرست وزارت امور خارجه در روزهای نزدیک به تاجیکستان سفر نماید و روی برنامه نشست روسای جمهور تاجیکستان و افغانستان کار کند.