حکمتیار تاجیکستان را به دست داشتن در نا امنی های اخیر افغانستان متهم کرد

گلبدین حکمتیار، رهبر حزب اسلامی افغانستان ادعا کرد حملات انتحاری اخیر در افغانستان توسط یک گروه تاجیکستانی انجام شده است.

به گزارش خبرگزاری اطلس، حکمتیار در خطبه های نماز جمعه بطور مشخص گفت حملات انتحاری مسجد حزب اسلامی، سفارت پاکستان و حمله به هوتل محل اقامت چینی‌ها در کابل از سوی یک گروه به رهبری یک تاجیکستانی انجام شده است.

رهبر حزب اسلامی افغانستان چندی پیش نیز مدعی شده بود در تلاشی های صورت گرفته از اجساد عوامل حمله به وی در مسجد حزب اسلامی، اسنادی بدست آمده که نشان میدهد مهاجمین از اعضای داعش و دارای تابعیت تاجیکستان بوده اند.

مقامات تاجیکستانی تا کنون در خصوص اتهامات آقای حکمتیار موضعی نگرفته اند.