تاجیکستان و چین مانور نظامی در مرز افغانستان اجرا می‌کنند

  • انتشار: ۱۰ عقرب ۱۴۰۰
  • سرویس: بین المللتیتر 1
  • شناسه مطلب: 123353

وزارت داخله تاجیکستان اعلام کرده که در پی راه اندازی یک مانور مشترک نظامی با چین، در مرز با افغانستان است.

وزارت داخله تاجیکستان در یک اعلامیه گفته که در چارچوب توافقنامه همکاری بین وزارت امور داخله جمهوری تاجیکستان و وزارت امنیت عمومی جمهوری خلق چین، در حال آمادگی گرفتن برای انجام یک مانور مشترک نظامی در مرز با افغانستان است.

بر بنیاد اعلامیه این مانور در ولایت بدخشان تاجیکستان به منظور مبارزه هراس افگنی برگزار خواهد شد.

در اعلامیه زمان برگزاری این مانور مشخص نشده است؛ اما گفته شده که تجهیزات و هزینه‌های آن از سوی دولت چین آماده و پرداخت خواهد شد.

این در حالی است که دو هفته پیش کشورهای امنیت دسته جمعی به رهبری روسیه یک مانور مشترک نظامی شش روزه را در مرز تاجیکستان با افغانستان برگزار کردند.

هدف از این مانور نظامی نیز آمادگی برای هرگونه احتمال حمله گروه های تروریستی به تاجیکستان، اعلام شد.

پس از قدرت گرفتن طالبان در افغانستان، مقامات تاجیکستان نسبت به رویدادهای این کشور اظهار نگرانی دارند که مبادا گروه‌‎های تروریستی از افغانستان وارد خاک تاجیکستان شوند.

روسیه نیز اعلام کرده که گروه‌های تروریستی در مرز مشترک کشورهای آسیای میانه در حال آمادگی گرفتن برای ورود به این کشورها هستند.

نظرات(۰ دیدگاه)

نظر شما چیست؟