وزارت امور خارجه: اظهارات کوچی، نظر شخصی خودش است

  • انتشار: ۲۶ جدی ۱۳۹۵
  • سرویس: تیتر 2سیاست
  • شناسه مطلب: 17030

وزارت امور خارجه، نسبت به اظهارات اخیر عبدالقیوم کوچی سفیر افغانستان در مسکو اظهار تاسف کرده می‌گوید که این اظهارات هرگز از سیاست خارجی افغانستان نمایندگی نمی‌کند، بلکه نظر شخصی آقای کوچی است.

عبــدالقیــوم کوچـــی سفـیر افغانستان در مسکــو و کاکای رییس‌جمهــور، اخیرا مقام‌های دولت تاجیکستان را به قاچاق مواد مخدر متهم کرده بود. او هم‌چنین گفته بود که سران کشورهای آسیای میانه دست‌نشانده روس‌ها هستند. تاجیکستان نسبت به این اظهارات شدیدا اعتراض کرده بود.

وزارت امور خارجه در اعلامیه‌ای نسبت به بیان چنین اظهاراتی ابراز تاسف کرده می‌گوید: ‌«اظهارات اخیر داکتر عبدالقیوم کوچی، سفیر جمهوری اسلامی افغانستان در مسکو، سبب ناراحتی برخی از کشورهای آسیای میانه به ویژه جمهوری تاجیکستان شده است. این اظهارات هرگز از سیاست خارجی جمهوری اسلامی افغانستان در قبال کشورهای همسایه و منطقه نمایندگی نمی‌کند و نظر شخصی او می‌باشد.»

وزارت امور خارجه از تاجیکستان به عنوان یک همسایه «خوب و دوست همیشگی» افغانستان یاد کرده می‌گوید که رابطه دوستانه و مناسبات نیک دو کشور بر مبنای مشترکات و روابط تاریخی دیرینه فرهنگی، زبانی و دینی دو ملت و هم‌چنین منافع ملی دو کشور استوار است.

این وزارت می‌افزاید: «خوشبختانه روابط جمهوری اسلامی افغانستان با جمهوری تاجیکستان در بخش‌های مختلف، در حال استحکام و تقویت بیشتر قرار دارد و هر دو کشور، در مجامع و سازمان‌های منطقه‌ای و بین‌المللی همواره از مواضع یک‌دیگر حمایت کرده‌اند.

نظرات(۰ دیدگاه)

نظر شما چیست؟